८. महद्धनसुत्तवण्णना

२८. अट्ठमे निधानगतं मुत्तसारादि महन्तं धनमेतेसन्ति महद्धना. सुवण्णरजतभाजनादि महाभोगो एतेसन्ति महाभोगा. अञ्ञमञ्ञाभिगिज्झन्तीति अञ्ञमञ्ञं अभिगिज्झन्ति पत्थेन्ति पिहेन्ति. अनलङ्कताति अतित्ता अपरियत्तजाता. उस्सुक्कजातेसूति नानाकिच्चजातेसु अनुप्पन्नानं रूपादीनं उप्पादनत्थाय उप्पन्नानं अनुभवनत्थाय उस्सुक्केसु. भवसोतानुसारीसूति वट्टसोतं अनुसरन्तेसु. अनुस्सुकाति अवावटा. अगारन्ति मातुगामेन सद्धिं गेहं. विराजियाति विराजेत्वा. सेसं उत्तानमेवाति. अट्ठमं.