भववारवण्णना

९४. भववारे कामभवोति कम्मभवो च उपपत्तिभवो च. तत्थ कम्मभवो नाम कामभवूपगं कम्ममेव. तञ्हि उपपत्तिभवस्स कारणत्ता ‘‘सुखो बुद्धानमुप्पादो (ध. प. १९४) दुक्खो पापस्स उच्चयो’’तिआदीनि (ध. प. ११७) विय फलवोहारेन भवोति वुत्तं. उपपत्तिभवो नाम तेन कम्मेन निब्बत्तं उपादिन्नखन्धपञ्चकं. तञ्हि तत्थ भवतीति कत्वा भवोति वुत्तं. एवं सब्बथापि इदं कम्मञ्च उपपत्ति च उभयम्पेतमिध ‘‘कामभवो’’ति वुत्तं. एस नयो रूपारूपभवेसु. उपादानसमुदयाति एत्थ पन उपादानं कुसलकम्मभवस्स उपनिस्सयवसेनेव पच्चयो होति. अकुसलकम्मभवस्स उपनिस्सयवसेनपि सहजातादिवसेनपि. उपपत्तिभवस्स पन सब्बस्सापि उपनिस्सयवसेनेव. सेसं वुत्तनयमेवाति.

भववारवण्णना निट्ठिता.