६. दुतियसीलसुत्तवण्णना

३३. छट्ठे भद्दकेन च सीलेनाति कायसुचरितादिचतुपारिसुद्धिसीलेन. तञ्हि अखण्डादिसीलभावेन सयञ्च कल्याणं, समथविपस्सनादिकल्याणगुणावहं चाति ‘‘भद्दक’’न्ति वुच्चति. भद्दिकाय च दिट्ठियाति कम्मस्सकताञाणेन चेव कम्मपथसम्मादिट्ठिया च. तत्थ भद्दकेन सीलेन पयोगसम्पन्नो होति, भद्दिकाय दिट्ठिया आसयसम्पन्नो. इति पयोगासयसम्पन्नो पुग्गलो सग्गूपगो होति. तेन वुत्तं – ‘‘इमेहि, खो, भिक्खवे, द्वीहि धम्मेहि समन्नागतो पुग्गलो यथाभतं निक्खित्तो, एवं सग्गे’’ति. सप्पञ्ञोति पञ्ञवा. सेसं सुविञ्ञेय्यमेव.

छट्ठसुत्तवण्णना निट्ठिता.