२८. महामोग्गल्लानत्थेरवत्थु

यस्सालयाति इमं धम्मदेसनं सत्था जेतवने विहरन्तो महामोग्गल्लानत्थेरं आरब्भ कथेसि. वत्थु पुरिमसदिसमेव. इध पन सत्था मोग्गल्लानत्थेरस्स नित्तण्हभावं वत्वा इमं गाथमाह –

४११. ‘‘यस्सालया न विज्जन्ति, अञ्ञाय अकथंकथी;

अमतोगधमनुप्पत्तं, तमहं ब्रूमि ब्राह्मण’’न्ति.

तत्थ आलयाति तण्हा. अञ्ञाय अकथंकथीति अट्ठ वत्थूनि यथाभूतं जानित्वा अट्ठवत्थुकाय विचिकिच्छाय निब्बिचिकिच्छो. अमतोगधमनुप्पत्तन्ति अमतं निब्बानं ओगाहेत्वा अनुप्पत्तं तमहं ब्राह्मणं वदामीति अत्थो.

देसनावसाने बहू सोतापत्तिफलादीनि पापुणिंसूति.

महामोग्गल्लानत्थेरवत्थु अट्ठवीसतिमं.