११. उज्झानसञ्ञित्थेरवत्थु

परवज्जानुपस्सिस्साति इमं धम्मदेसनं सत्था जेतवने विहरन्तो उज्झानसञ्ञिं नाम एकं थेरं आरब्भ कथेसि.

सो किर ‘‘अयं एवं निवासेति, एवं पारुपती’’ति भिक्खूनं अन्तरमेव गवेसन्तो विचरति. भिक्खू ‘‘असुको नाम, भन्ते, थेरो एवं करोती’’ति सत्थु आरोचेसुं. सत्था, ‘‘भिक्खवे, वत्तसीसे ठत्वा एवं ओवदन्तो अननुपवादो. यो पन निच्चं उज्झानसञ्ञिताय परेसं अन्तरं परियेसमानो एवं वत्वा विचरति, तस्स झानादीसु एकोपि विसेसो नुप्पज्जति, केवलं आसवायेव वड्ढन्ती’’ति वत्वा इमं गाथमाह –

२५३. ‘‘परवज्जानुपस्सिस्स, निच्चं उज्झानसञ्ञिनो;

आसवा तस्स वड्ढन्ति, आरा सो आसवक्खया’’ति.

तत्थ उज्झानसञ्ञिनोति एवं निवासेतब्बं एवं पारुपितब्बन्ति परेसं अन्तरगवेसिताय उज्झानबहुलस्स पुग्गलस्स झानादीसु एकधम्मोपि न वड्ढति, अथ खो आसवाव तस्स वड्ढन्ति. तेनेव कारणेन सो अरहत्तमग्गसङ्खाता आसवक्खया आरा दूरं गतोव होतीति.

देसनावसाने बहू सोतापत्तिफलादीनि पापुणिंसूति.

उज्झानसञ्ञित्थेरवत्थु एकादसमं.