फस्सपच्चयवारवण्णना

११८-१३०. पुन – ‘‘तत्र, भिक्खवे, ये ते समणब्राह्मणा सस्सतवादा’’तिआदि परम्परपच्चयदस्सनत्थं आरद्धं. तत्थ तदपि फस्सपच्चयाति येन दिट्ठिअस्सादेन दिट्ठिसुखेन दिट्ठिवेदयितेन ते सोमनस्सजाता सस्सतं अत्तानञ्च लोकञ्च पञ्ञपेन्ति चतूहि वत्थूहि, तदपि तण्हादिट्ठिपरिफन्दितं वेदयितं फस्सपच्चयाति दस्सेति. एस नयो सब्बत्थ.

१३१-१४३. इदानि तस्स पच्चयस्स दिट्ठिवेदयिते बलवभावदस्सनत्थं पुन – ‘‘तत्र, भिक्खवे, ये ते समणब्राह्मणा सस्सतवादा’’तिआदिमाह. तत्थ ते वत अञ्ञत्र फस्साति ते वत समणब्राह्मणा तं वेदयितं विना फस्सेन पटिसंवेदिस्सन्तीति कारणमेतं नत्थीति. यथा हि पततो गेहस्स उपत्थम्भनत्थाय थूणा नाम बलवपच्चयो होति, न तं थूणाय अनुपत्थम्भितं ठातुं सक्कोति, एवमेव फस्सोपि वेदनाय बलवपच्चयो, तं विना इदं दिट्ठिवेदयितं नत्थीति दस्सेति. एस नयो सब्बत्थ.