(७.) सत्तकनिद्देसवण्णना

९४९. सत्तकनिद्देसे थामगतट्ठेन अप्पहीनट्ठेन च अनुसेन्तीति अनुसया. वट्टस्मिं सत्ते संयोजेन्ति घटेन्तीति संयोजनानि. समुदाचारवसेन परियुट्ठहन्तीति परियुट्ठानानि. कामरागोव परियुट्ठानं कामरागपरियुट्ठानं. सेसेसुपि एसेव नयो.

९५०. असतं धम्मा, लामकट्ठेन वा असन्ता धम्माति असद्धम्मा. रागादीहि दोसेहि दुट्ठानि चरितानीति दुच्चरितानि. तेन तेनाकारेन मञ्ञन्तीति माना.

९५१. दिट्ठिनिद्देसे रूपीति रूपवा. चातुमहाभूतिकोति चतुमहाभूतमयो. मातापितूनं एतन्ति मातापेत्तिकं. किन्तं? सुक्कसोणितं. मातापेत्तिके सम्भूतो जातोति मातापेत्तिकसम्भवो. इध रूपकायसीसेन मनुस्सत्तभावं अत्ताति वदति. दुतियो तं पटिक्खिपित्वा दिब्बत्तभावं वदति. दिब्बोति देवलोके सम्भूतो. कामावचरोति छकामावचरदेवपरियापन्नो. कबळीकारं भक्खयतीति कबळीकारभक्खो. मनोमयोति झानमनेन निब्बत्तो. सब्बङ्गपच्चङ्गीति सब्बङ्गपच्चङ्गयुत्तो. अहीनिन्द्रियोति परिपुण्णिन्द्रियो; यानि ब्रह्मलोके अत्थि तेसं वसेन, इतरेसञ्च सण्ठानवसेनेतं वुत्तं. आकासानञ्चायतनूपगोति आकासानञ्चायतनभावं उपगतो. इतरेसुपि एसेव नयो. सेसं सब्बत्थ उत्तानत्थमेवाति.

सत्तकनिद्देसवण्णना.