२. अभिधम्मभाजनीयवण्णना

४७२. अभिधम्मभाजनीये सत्तपि बोज्झङ्गे एकतो पुच्छित्वा विस्सज्जनस्स च पाटियेक्कं पुच्छित्वा विस्सज्जनस्स च वसेन द्वे नया. तेसं अत्थवण्णना हेट्ठा वुत्तनयेनेव वेदितब्बा.

उपेक्खासम्बोज्झङ्गनिद्देसे पन उपेक्खनवसेन उपेक्खा. उपेक्खनाकारो उपेक्खना. उपेक्खितब्बयुत्ते समप्पवत्ते धम्मे इक्खति, न चोदेतीति उपेक्खा. पुग्गलं उपेक्खापेतीति उपेक्खना. बोज्झङ्गभावप्पत्तिया लोकियउपेक्खनाय अधिका उपेक्खना अज्झुपेक्खना. अब्यापारापज्जनेन मज्झत्तभावो मज्झत्तता. सा पन चित्तस्स, न सत्तस्साति दीपेतुं मज्झत्तता चित्तस्साति वुत्तन्ति. अयमेत्थ अनुपुब्बपदवण्णना.

नया पनेत्थ गणेतब्बा – सत्तन्नम्पि हि बोज्झङ्गानं एकतो पुच्छित्वा विस्सज्जने एकेकमग्गे नयसहस्सं नयसहस्सन्ति चत्तारि नयसहस्सानि विभत्तानि. पाटियेक्कं पुच्छित्वा विस्सज्जने एकेकबोज्झङ्गवसेन चत्तारि चत्तारीति सत्त चतुक्का अट्ठवीसति. तानि पुरिमेहि चतूहि सद्धिं द्वत्तिंसाति सब्बानिपि अभिधम्मभाजनीये द्वत्तिंस नयसहस्सानि विभत्तानि कुसलानेव. यस्मा पन फलक्खणेपि बोज्झङ्गा लब्भन्ति, कुसलहेतुकानि च सामञ्ञफलानि, तस्मा तेसुपि बोज्झङ्गदस्सनत्थं कुसलनिद्देसपुब्बङ्गमाय एव तन्तिया विपाकनयो आरद्धो. सोपि एकतो पुच्छित्वा विस्सज्जनस्स च, पाटियेक्कं पुच्छित्वा विस्सज्जनस्स च वसेन दुविधो होति. सेसमेत्थ हेट्ठा वुत्तनयेनेव वेदितब्बं. विपाके पन कुसलतो तिगुणा नया कातब्बाति.

अभिधम्मभाजनीयवण्णना.