४. सङ्खारक्खन्धनिद्देसो

२०. सङ्खारक्खन्धनिद्देसे ये केचि सङ्खाराति चतुभूमिकसङ्खारे परियादियति. चक्खुसम्फस्सजा चेतनातिआदीनि अतीतादिवसेन निद्दिट्ठसङ्खारे सभावतो दस्सेतुं वुत्तानि. चक्खुसम्फस्सजातिआदीनि वुत्तत्थानेव. चेतनाति हेट्ठिमकोटिया पधानसङ्खारवसेन वुत्तं. हेट्ठिमकोटिया हि अन्तमसो चक्खुविञ्ञाणेन सद्धिं पाळियं आगता चत्तारो सङ्खारा उप्पज्जन्ति. तेसु चेतना पधाना आयूहनट्ठेन पाकटत्ता. तस्मा अयमेव गहिता. तंसम्पयुत्तसङ्खारा पन ताय गहिताय गहिताव होन्ति. इधापि पुरिमा पञ्च चक्खुपसादादिवत्थुकाव. मनोसम्फस्सजा हदयवत्थुकापि अवत्थुकापि. सब्बा चतुभूमिकचेतना. सेसं वेदनाक्खन्धसदिसमेवाति.

अयं सङ्खारक्खन्धनिद्देसो.