२. सुत्तसाधनवण्णना

२९८. सुत्तसाधने पन न वत्तब्बन्ति पुच्छा सकवादिस्स. तत्थ नत्थि चेतेति नत्थि च एते धम्माति अत्थो. खन्धादिभावे सति नत्थितं अनिच्छन्तस्स आमन्ताति पटिञ्ञा परवादिस्स, अथ नेसं नत्थिभावसाधनत्थं सुत्ताहरणं सकवादिस्स. दुतियपुच्छापि परवादिस्स, पटिञ्ञा सकवादिस्स, सुत्ताहरणं परवादिस्स. तं पन नेसं खन्धादिभावमेव साधेति, न अत्थिभावन्ति आहटम्पि अनाहटसदिसमेवाति.

अतीतं खन्धातिआदिकथावण्णना.