१. एकाधिप्पायकथावण्णना

९०८. इदानि एकाधिप्पायकथा नाम होति. तत्थ कारुञ्ञेन वा एकेन अधिप्पायेन एकाधिप्पायो, संसारे वा एकतो भविस्सामाति इत्थिया सद्धिं बुद्धपूजादीनि कत्वा पणिधिवसेन एको अधिप्पायो अस्साति एकाधिप्पायो. एवरूपो द्विन्नम्पि जनानं एकाधिप्पायो मेथुनो धम्मो पटिसेवितब्बोति येसं लद्धि, सेय्यथापि अन्धकानञ्चेव वेतुल्लकानञ्च; ते सन्धाय पुच्छा सकवादिस्स, पटिञ्ञा इतरस्स. सेसमेत्थ यथापाळिमेव निय्यातीति.

एकाधिप्पायकथावण्णना.