२. कुसलचित्तकथावण्णना

८९४-८९५. इदानि कुसलचित्तकथा नाम होति. तत्थ यस्मा अरहा सतिवेपुल्लप्पत्तो परिनिब्बायन्तोपि सतो सम्पजानोव परिनिब्बाति, तस्मा कुसलचित्तो परिनिब्बायतीति येसं लद्धि, सेय्यथापि अन्धकानं; ते सन्धाय पुच्छा सकवादिस्स, पटिञ्ञा इतरस्स. अथ नं यस्मा कुसलचित्तो नाम पुञ्ञाभिसङ्खाराभिसङ्खरणादिवसेन होति, तस्मा तेनत्थेन चोदेतुं अरहा पुञ्ञाभिसङ्खारन्तिआदिमाह. सेसमेत्थ यथापाळिमेव निय्याति. सतो सम्पजानोति इदं जवनक्खणे किरियसतिसम्पजञ्ञानं वसेन असम्मोहमरणदीपनत्थं वुत्तं, न कुसलचित्तदीपनत्थं. तस्मा असाधकन्ति.

कुसलचित्तकथावण्णना.