८. इन्द्रियकथावण्णना

८५३-८५६. इदानि इन्द्रियकथा नाम होति. तत्थ लोकिया सद्धा सद्धा एव नाम, न सद्धिन्द्रियं. तथा लोकियं वीरियं…पे… सति… समाधि… पञ्ञा पञ्ञायेव नाम, न पञ्ञिन्द्रियन्ति येसं लद्धि, सेय्यथापि हेतुवादानञ्चेव महिसासकानञ्च; ते सन्धाय पुच्छा सकवादिस्स, पटिञ्ञा इतरस्स. नत्थि लोकिया सद्धातिआदि यस्मा लोकियापि सद्धादयोव धम्मा अधिपतियट्ठेन इन्द्रियं, न सद्धादीहि अञ्ञं सद्धिन्द्रियादि नाम अत्थि, तस्मा लोकियानम्पि सद्धादीनञ्ञेव सद्धिन्द्रियादिभावदस्सनत्थं वुत्तं. अत्थि लोकियो मनोतिआदि यथा ते लोकियापि मनादयो धम्मा मनिन्द्रियादीनि, एवं लोकिया सद्धादयोपि सद्धिन्द्रियानीति उपमाय तस्सत्थस्स विभावनत्थं वुत्तं. सेसमेत्थ यथापाळिमेव निय्यातीति.

इन्द्रियकथावण्णना.

एकूनवीसतिमो वग्गो.