४. पत्तिकथावण्णना

८३७-८४०. इदानि पत्तिकथा नाम होति. तत्थ ‘‘यं यं पटिलब्भति, तस्स तस्स पटिलाभो पत्ति नाम. सा च असङ्खता’’ति येसं लद्धि, सेय्यथापि पुब्बसेलियानञ्ञेव; ते सन्धाय पुच्छा सकवादिस्स, पटिञ्ञा इतरस्स. सेसमिधापि हेट्ठा वुत्तनयत्ता यथापाळिमेव निय्यातीति. न वत्तब्बन्तिआदि याय लद्धिया पत्ति असङ्खताति मञ्ञति, तं पकासेतुं वुत्तं. तत्थ सकवादी ‘‘न हेवं वत्तब्बे’’ति पटिक्खिपन्तो केवलं पत्तिया रूपादिभावं न सम्पटिच्छति. न हि पत्ति नाम कोचि धम्मो अत्थि, न पन असङ्खतभावं अनुजानाति. इतरो पन पटिक्खेपमत्तेनेव असङ्खताति लद्धिं पतिट्ठपेति, सा अयोनिसो पतिट्ठापितत्ता अप्पतिट्ठितायेवाति.

पत्तिकथावण्णना.