९. रूपं रूपावचरारूपावचरन्तिकथावण्णना

७६८-७७०. इदानि रूपं रूपावचरारूपावचरन्तिकथा नाम होति. तत्थ यं कामावचरकम्मस्स कतत्ता रूपं, तं यस्मा कामावचरं, तस्मा रूपावचरारूपावचरकम्मानम्पि कतत्ता रूपेन रूपावचरारूपावचरेन भवितब्बन्ति येसं लद्धि, सेय्यथापि अन्धकानं; ते सन्धाय अत्थि रूपं रूपावचरारूपावचरन्ति पुच्छा सकवादिस्स, पटिञ्ञा इतरस्स. सेसमेत्थ हेट्ठा वुत्तनयमेवाति.

रूपं रूपावचरारूपावचरन्तिकथावण्णना.