३. अद्धाकथावण्णना

७२०-७२१. इदानि अद्धाकथा नाम होति. तत्थ ‘‘तीणिमानि, भिक्खवे, कथावत्थूनी’’ति (अ. नि. ३.६८) सुत्तं निस्साय कालसङ्खातो अद्धा नाम परिनिप्फन्नो अत्थीति येसं लद्धि; तेसं ‘‘अद्धा नाम कोचि परिनिप्फन्नो नत्थि अञ्ञत्र कालपञ्ञत्तिमत्ता. रूपादयो पन खन्धाव परिनिप्फन्ना’’ति विभागं दस्सेतुं अद्धा परिनिप्फन्नोति पुच्छा सकवादिस्स, पटिञ्ञा इतरस्स. अथ नं ‘‘सचे सो परिनिप्फन्नो, रूपादीसु अनेन अञ्ञतरेन भवितब्ब’’न्ति चोदेतुं रूपन्तिआदिमाह. इतरो पटिक्खिपति. सेसं यथापाळिमेव निय्यातीति.

अद्धाकथावण्णना.