५. निवुतकथावण्णना

६६५-६६७. इदानि निवुतकथा नाम होति. तत्थ सुद्धस्स सुद्धकिच्चाभावतो नीवरणेहि निवुतो ओफुटो परियोनद्धो च नीवरणं जहतीति येसं लद्धि, सेय्यथापि उत्तरापथकानं; ते सन्धाय निवुतोतिपुच्छा सकवादिस्स, पटिञ्ञा इतरस्स. रत्तो रागन्तिआदि निवुतस्स नीवरणजहने दोसदस्सनत्थं वुत्तं. परिसुद्धे परियोदातेतिआदि विक्खम्भनविसुद्धिया विसुद्धस्स समुच्छेदविसुद्धिदस्सनत्थं वुत्तं. तस्स एवं जानतोतिआदि जानतो पस्सतो आसवक्खयं दीपेति, न निवुतस्स नीवरणजहनं, तस्मा असाधकन्ति.

निवुतकथावण्णना.