८. जीवितावोरोपनकथावण्णना

६४८-६४९. इदानि जीवितावोरोपनकथा नाम होति. तत्थ यस्मा दोससम्पयुत्तेन चित्तेन पाणातिपातो होति, दोसो च दिट्ठिसम्पन्नस्स अप्पहीनो, तस्मा ‘‘दिट्ठिसम्पन्नो सञ्चिच्च पाणं जीविता वोरोपेय्या’’ति येसं लद्धि, सेय्यथापि पुब्बसेलियापरसेलियानं; ते सन्धाय दिट्ठिसम्पन्नोति पुच्छा सकवादिस्स, पटिञ्ञा इतरस्स. सञ्चिच्च मातरन्तिआदिपञ्हेसु पन ‘‘अट्ठानमेतं अनवकासो’’ति सुत्तभयेन पटिक्खिपति. सत्थरि अगारवोतिआदि सत्थारादीसु सगारवस्स सिक्खापदस्स वीतिक्कमाभावदस्सनत्थं वुत्तं. इतरो पन अकुसलवसेन तस्स अगारवो नाम नत्थीति पटिक्खिपित्वा सगारवभावञ्च सम्पटिच्छित्वा पुन अगारवोति पुट्ठो तेसु तेसु किच्चेसु पसुतताय विक्खित्तानं असतिया अमनसिकारेन चेतिये अभिवादनपदक्खिणकरणाभावं सन्धाय पटिजानाति. पुन ओहदेय्यातिआदिना नयेन पुट्ठो तादिसाय किरियाय सञ्चिच्च अकरणतो पटिक्खिपति. सेसमेत्थ उत्तानत्थमेवाति.

जीवितावोरोपनकथावण्णना.