११. अतीतानागतसमन्नागतकथावण्णना

५६८-५७०. इदानि अतीतानागतेहि समन्नागतकथा नाम होति. तत्थ समन्नागतपञ्ञत्ति पटिलाभपञ्ञत्तीति द्वे पञ्ञत्तियो वेदितब्बा. तासु पच्चुप्पन्नधम्मसमङ्गी समन्नागतोति वुच्चति. अट्ठ समापत्तिलाभिनो पन समापत्तियो किञ्चापि न एकक्खणे पवत्तन्ति, अञ्ञा अतीता होन्ति, अञ्ञा अनागता, अञ्ञा पच्चुप्पन्ना, पटिविज्झित्वा अपरिहीनताय पन लाभीति वुच्चति. तत्थ येसं इमं विभागं अग्गहेत्वा यस्मा झानलाभीनं अतीतानागतानि झानानिपि अत्थि, तस्मा ‘‘ते अतीतेनपि अनागतेनपि समन्नागता’’ति लद्धि, सेय्यथापि अन्धकानं. ते सन्धाय पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति. ‘‘अट्ठविमोक्खझायी’’तिआदि पन लाभीभावस्स साधकं, न समन्नागतभावस्साति.

अतीतानागतसमन्नागतकथावण्णना.

नवमो वग्गो.