१०. सब्बसंयोजनप्पहानकथावण्णना

४१३. इदानि संयोजनप्पहानकथा नाम होति. तत्थ येसं ‘‘निप्परियायेनेव सब्बसंयोजनप्पहानं अरहत्त’’न्ति लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, पटिञ्ञा इतरस्स. पुन सब्बे संयोजनाति पुट्ठो हेट्ठा वुत्तमग्गत्तयेन पहीने सन्धाय पटिक्खिपति. दुतियं पुट्ठो तेन मग्गेन अप्पहीनस्स अभावा पटिजानाति. सक्कायदिट्ठिआदीसुपि पठममग्गेन पहीनभावं सन्धाय पटिक्खिपति, चतुत्थमग्गेन अनवसेसप्पहानं सन्धाय पटिजानाति. एसेव नयो सब्बत्थाति.

सब्बसंयोजनप्पहानकथावण्णना.

चतुत्थो वग्गो.