१२. द्वादसमनयो सम्पयुत्तेनसङ्गहितासङ्गहितपदवण्णना

४१७. इदानि सम्पयुत्तेनसङ्गहितासङ्गहितपदं भाजेतुं वेदनाक्खन्धेनातिआदि आरद्धं. तत्थ ये सम्पयुत्तेनसम्पयुत्तपदनिद्देसे वेदनाक्खन्धादयो धम्मा उद्धटा, सब्बपुच्छासु तेयेव उद्धटा. तत्थ ये धम्मा पुच्छाय उद्धटपदेन सम्पयुत्ता, तेसं येहि सङ्गहो वा असङ्गहो वा होति, तेसं वसेन खन्धादिभेदो वेदितब्बो.

तत्रायं नयो – वेदनाक्खन्धो हि सञ्ञादीहि सम्पयुत्तो. ते सञ्ञादयो तीहि सञ्ञादिक्खन्धेहि, द्वीहि धम्मायतनमनायतनेहि, धम्मधातुया चेव, सत्तहि च विञ्ञाणधातूहीति अट्ठहि धातूहि सङ्गहिता, सेसाहि खन्धायतनधातूहि असङ्गहिता. इमिना उपायेन सब्बत्थ अत्थो वेदितब्बोति.

सम्पयुत्तेनसङ्गहितासङ्गहितपदवण्णना.