५. बलसुत्तवण्णना

५. पञ्चमे अविज्जाकोसज्जसावज्जअस्सद्धियेसु अकम्पनतो पञ्ञाबलादीनि दट्ठब्बानि. अकुसलसङ्खाताति अकुसलाति ञाता. एस नयो सब्बत्थ. नालमरियाति अरियभावं कातुं असमत्था, अरियानं वा अननुच्छविका. वोदिट्ठाति सुट्ठु दिट्ठा. वोचरिताति मनोद्वारे समुदाचारप्पत्ता. अत्थिकस्साति धम्मदेसनाय अत्थिकस्स. आजीविकाभयन्ति जीवितवुत्तिभयं. असिलोकभयन्ति गरहाभयं. परिसासारज्जभयन्ति परिसं पत्वा सारज्जं ओक्कमनभयं. इमस्मिं सुत्ते वट्टविवट्टं कथितं.