२. कायसक्खिसुत्तवण्णना

४३. दुतिये यथा यथा च तदायतनन्ति येन येन कारणेन येन येनाकारेन तं पठमज्झानसङ्खातं आयतनं होति. तथा तथा नं कायेन फुसित्वा विहरतीति तेन तेन कारणेन तेन तेनाकारेन तं समापत्तिं सहजातनामकायेन फुसित्वा विहरति, समापज्जतीति अत्थो. कायसक्खि वुत्तो भगवता परियायेनाति यस्मा तेन नामाकायेन पठमज्झानं सच्छिकतं, तस्मा इमिना परियायेन कायसक्खि वुत्तो. निप्परियायेनाति यत्तकं कायेन सच्छिकातब्बं, सब्बस्स कतत्ता अयं निप्परियायेन कायसक्खि नाम.