५. मलसुत्तवण्णना

१५. पञ्चमे असज्झायमलाति उग्गहितमन्तानं असज्झायकरणं मलं नाम होति. अनुट्ठानमला घराति उट्ठानवीरियाभावो घरानं मलं नाम. वण्णस्साति सरीरवण्णस्स. रक्खतोति यंकिञ्चि अत्तनो सन्तकं रक्खन्तस्स. अविज्जा परमं मलन्ति ततो सेसाकुसलधम्ममलतो अट्ठसु ठानेसु अञ्ञाणभूता वट्टमूलसङ्खाता बहलन्धकारअविज्जा परमं मलं. ततो हि मलतरं नाम नत्थि. इमस्मिम्पि सुत्ते वट्टमेव कथितं.