४. धम्मञ्ञूसुत्तवण्णना

६८. चतुत्थे कालं जानातीति युत्तप्पत्तकालं जानाति. अयं कालो उद्देसस्साति अयं बुद्धवचनं उग्गण्हनकालो. परिपुच्छायाति अत्थानत्थं कारणाकारणं परिपुच्छाय. योगस्साति योगे कम्मं पक्खिपनस्स. पटिसल्लानस्साति निलीयनस्स एकीभावस्स. धम्मानुधम्मप्पटिपन्नोति नवन्नं लोकुत्तरधम्मानं अनुरूपधम्मं पुब्बभागपटिपदं पटिपन्नो. एवं खो, भिक्खवे, भिक्खु पुग्गलपरोपरञ्ञू होतीति एवं भिक्खु पुग्गलानं परोपरं तिक्खमुदुभावं जाननसमत्थो नाम होति.