१. अब्याकतसुत्तवण्णना

५४. छट्ठवग्गस्स पठमे अब्याकतवत्थूसूति एकंसादिवसेन अकथितवत्थूसु. तथागतोति सत्तो. दिट्ठिगतमेतन्ति मिच्छादिट्ठिमत्तकमेतं, न ताय दिट्ठिया गहितसत्तो नाम अत्थि. पटिपदन्ति अरियमग्गं. न छम्भतीति दिट्ठिवसेन न कम्पति. सेसपदेसुपि एसेव नयो. तण्हागतन्ति दिट्ठितण्हा. सञ्ञागतादीसुपि एसेव नयो. दिट्ठिसञ्ञा एव हेत्थ सञ्ञागतं, दिट्ठिनिस्सितमानोयेव दिट्ठिमञ्ञितमेव वा मञ्ञितं, दिट्ठिपपञ्चोव पपञ्चितं, दिट्ठुपादानमेव उपादानं, दिट्ठिया विरूपं पटिसरणभावोयेव विप्पटिसारो नामाति वेदितब्बो. एत्थ च दिट्ठिग्गहणेन द्वासट्ठि दिट्ठियो, दिट्ठिनिरोधगामिनिपटिपदागहणेन सोतापत्तिमग्गो गहितोति.