८. अत्तकारीसुत्तवण्णना

३८. अट्ठमे अद्दसं वा अस्सोसिं वाति अक्खीनि उम्मीलेत्वा मा अद्दसं, असुकस्मिं नाम ठाने वसतीति मा अस्सोसिं, कथेन्तस्स वा वचनं मा अस्सोसिं. कथञ्हि नामाति केन नाम कारणेन. आरम्भधातूति आरभनवसेन पवत्तवीरियं. निक्कमधातूति कोसज्जतो निक्खमनसभावं वीरियं. परक्कमधातूति परक्कमसभावो. थामधातूति थामसभावो. ठितिधातूति ठितिसभावो. उपक्कमधातूति उपक्कमसभावो. सब्बं चेतं तेन तेनाकारेन पवत्तस्स वीरियस्सेव नामं.