५. अनुस्सतिट्ठानसुत्तवण्णना

२५. पञ्चमे अनुस्सतिट्ठानानीति अनुस्सतिकारणानि. इतिपि सो भगवातिआदीनि विसुद्धिमग्गे (विसुद्धि. १.१२३ आदयो) वित्थारितानेव. इदम्पि खो, भिक्खवे, आरम्मणं करित्वाति इदं बुद्धानुस्सतिकम्मट्ठानं आरम्मणं करित्वा. विसुज्झन्तीति परमविसुद्धिं निब्बानं पापुणन्ति. सेसं सब्बत्थ उत्तानत्थमेव. इमस्मिं पन सुत्ते छ अनुस्सतिट्ठानानि मिस्सकानि कथितानीति वेदितब्बानि.