१-२. सामकसुत्तादिवण्णना

२१-२२. ततियस्स पठमे सामगामकेति सामकानं उस्सन्नत्ता एवंलद्धनामे गामके. पोक्खरणियायन्ति पोक्खरणियानामके विहारे. अभिक्कन्ताय रत्तियाति रत्तिया पठमयामं अतिक्कम्म मज्झिमयामे सम्पत्ते. अभिक्कन्तवण्णाति अभिक्कन्तअतिमनापवण्णा. केवलकप्पन्ति सकलकप्पं. पोक्खरणियं ओभासेत्वाति पोक्खरणियानामकं महाविहारं अत्तनो ओभासेन फरित्वा. समनुञ्ञोति समानअनुञ्ञो समानचित्तो. दोवचस्सताति दुब्बचभावो. पापमित्तताति लामकमित्तता. इमस्मिं सुत्ते परिहानियधम्माव कथिता. दुतिये अपरिहानियधम्मा लोकुत्तरमिस्सका कथिता.