१. पठमआहुनेय्यसुत्तवण्णना

१. छक्कनिपातस्स पठमे इध, भिक्खवे, भिक्खूति, भिक्खवे, इमस्मिं सासने भिक्खु. नेव सुमनो होति न दुम्मनोति इट्ठारम्मणे रागसहगतेन सोमनस्सेन सुमनो वा अनिट्ठारम्मणे दोससहगतेन दोमनस्सेन दुम्मनो वा न होति. उपेक्खको विहरति सतो सम्पजानोति मज्झत्तारम्मणे असमपेक्खनेन अञ्ञाणुपेक्खाय उपेक्खकभावं अनापज्जित्वा सतो सम्पजानो हुत्वा आरम्मणे मज्झत्तो विहरति. इमस्मिं सुत्ते खीणासवस्स सततविहारो कथितो.