७. वणिज्जासुत्तवण्णना

१७७. सत्तमे वणिज्जाति वाणिजकम्मानि. उपासकेनाति तिसरणगतेन. सत्थवणिज्जाति आवुधभण्डं कारेत्वा तस्स विक्कयो. सत्तवणिज्जाति मनुस्सविक्कयो. मंसवणिज्जाति सूकरमिगादयो पोसेत्वा तेसं विक्कयो. मज्जवणिज्जाति यंकिञ्चि मज्जं कारेत्वा तस्स विक्कयो. विसवणिज्जाति विसं कारेत्वा तस्स विक्कयो. इति सब्बम्पि इमं वणिज्जं नेव अत्तना कातुं, न परे समादपेत्वा कारेतुं वट्टति.