२. उस्सङ्कितसुत्तवण्णना

१०२. दुतिये उस्सङ्कितपरिसङ्कितोति उस्सङ्कितो च परिसङ्कितो च. अपि अकुप्पधम्मोपीति अपि अकुप्पधम्मो खीणासवो समानोपि परेहि पापभिक्खूहि उस्सङ्कितपरिसङ्कितो होतीति अत्थो. वेसियागोचरोतिआदीसु वेसिया वुच्चन्ति रूपूपजीविनियो, ता गोचरो अस्साति वेसियागोचरो, तासं गेहं अभिण्हगमनोति अत्थो. सेसपदेसुपि एसेव नयो. तत्थ पन विधवाति मतपतिका. थुल्लकुमारिकाति महल्लिककुमारिकायो.