९. सीहसुत्तवण्णना

९९. नवमे सक्कच्चञ्ञेव देति नो असक्कच्चन्ति अनवञ्ञाय अविरज्झित्वाव देति, नो अवञ्ञाय विरज्झित्वा. मा मे योग्गपथो नस्साति मया कतयोग्गपथो मय्हं मा नस्सतु, ‘‘एको सीहो उट्ठाय बिळारं पहरन्तो विरज्झित्वा पहरी’’ति एवं वत्तारो मा होन्तूति अत्थो. अन्नभारनेसादानन्ति एत्थ अन्नं वुच्चति यवभत्तं, तं भारो एतेसन्ति अन्नभारा. याचकानं एतं नामं. नेसादा वुच्चन्ति साकुणिका. इति सब्बपच्छिमाय कोटिया एतेसं याचकनेसादानम्पि सक्कच्चमेव देसेति.