६. पटिसम्भिदाप्पत्तसुत्तवण्णना

८६. छट्ठे अत्थपटिसम्भिदाप्पत्तोति पञ्चसु अत्थेसु पभेदगतं ञाणं पत्तो. धम्मपटिसम्भिदाप्पत्तोति चतुब्बिधे धम्मे पभेदगतं ञाणं पत्तो. निरुत्तिपटिसम्भिदाप्पत्तोति धम्मनिरुत्तीसु पभेदगतं ञाणं पत्तो. पटिभानपटिसम्भिदाप्पत्तोति तेसु तीसु ञाणेसु पभेदगतं ञाणं पत्तो. सो पन तानि तीणि ञाणानेव जानाति, न तेसं किच्चं करोति. उच्चावचानीति महन्तखुद्दकानि. किंकरणीयानीति इति कत्तब्बानि.