५. मातापुत्तसुत्तवण्णना

५५. पञ्चमे परियादाय तिट्ठतीति परियादियित्वा गहेत्वा खेपेत्वा तिट्ठति. उग्घातिताति उद्धुमाता.

असिहत्थेनाति सीसच्छेदनत्थाय असिं आदाय आगतेनापि. पिसाचेनाति खादितुं आगतयक्खेनापि. आसीदेति घट्टेय्य. मञ्जुनाति मुदुकेन. कामोघवुळ्हानन्ति कामोघेन वुळ्हानं कड्ढितानं. कालं गति भवाभवन्ति वट्टकालं गतिञ्च पुनप्पुनब्भवे च. पुरक्खताति पुरेचारिका पुरतो गतायेव. ये च कामे परिञ्ञायाति ये पण्डिता दुविधेपि कामे तीहि परिञ्ञाहि परिजानित्वा. चरन्ति अकुतोभयाति खीणासवानं कुतोचि भयं नाम नत्थि, तस्मा ते अकुतोभया हुत्वा चरन्ति. पारङ्गताति पारं वुच्चति निब्बानं, तं उपगता, सच्छिकत्वा ठिताति अत्थो. आसवक्खयन्ति अरहत्तं. इमस्मिं सुत्ते वट्टमेव कथेत्वा गाथासु वट्टविवट्टं कथितं.