८. अलब्भनीयठानसुत्तवण्णना

४८. अट्ठमे अलब्भनीयानीति अलद्धब्बानि, न सक्का लभितुं. ठानानीति कारणानि. जराधम्मं मा जीरीति यं मय्हं जरासभावं, तं मा जीरतु. सेसपदेसुपि एसेव नयो. नच्छादेय्याति न रुच्चेय्य. अब्बुहीति नीहरि.

यतोति यस्मिं काले. आपदासूति उपद्दवेसु. न वेधतीति न कम्पति नानुसोचति. अत्थविनिच्छयञ्ञूति कारणत्थविनिच्छये कुसलो. पुराणन्ति निब्बिकारताय पोराणकमेव. जप्पेनाति वण्णभणनेन. मन्तेनाति महानुभावमन्तपरिवत्तनेन. सुभासितेनाति सुभासितकथनेन. अनुप्पदानेनाति सतस्स वा सहस्सस्स वा दानेन. पवेणिया वाति कुलवंसेन वा, ‘‘इदं अम्हाकं पवेणिया आचिण्णं, इदं अनाचिण्ण’’न्ति एवं पवेणिकथनेनाति अत्थो. यथा यथा यत्थ लभेथ अत्थन्ति एतेसु जप्पादीसु येन येन यत्थ यत्थ ठाने जराधम्मादीनं अजीरणतादिअत्थं लभेय्य. तथा तथा तत्थ परक्कमेय्याति तेन तेन तस्मिं तस्मिं ठाने परक्कमं करेय्य. कम्मं दळ्हन्ति वट्टगामिकम्मं मया थिरं कत्वा आयूहितं, स्वाहं इदानि किन्ति करोमीति एवं पच्चवेक्खित्वा अधिवासेय्याति.