१. आदियसुत्तवण्णना

४१. पञ्चमस्स पठमे भोगानं आदियाति भोगानं आदातब्बकारणानि. उट्ठानवीरियाधिगतेहीति उट्ठानसङ्खातेन वीरियेन अधिगतेहि. बाहाबलपरिचितेहीति बाहुबलेन सञ्चितेहि. सेदावक्खित्तेहीति सेदं अवक्खिपेत्वा उप्पादितेहि. धम्मिकेहीति धम्मयुत्तेहि. धम्मलद्धेहीति दसकुसलकम्मं अकोपेत्वा लद्धेहि. पीणेतीति पीणितं थूलं करोति. सेसमेत्थ चतुक्कनिपाते वुत्तनयेनेव वेदितब्बं. दुतियं उत्तानत्थमेव.