२. चुन्दीसुत्तवण्णना

३२. दुतिये पञ्चहि रथसतेहीति भुत्तपातरासा पितु सन्तिकं पेसेत्वा पञ्च रथसतानि योजापेत्वा तेहि परिवुताति अत्थो. उपसङ्कमीति भातरा सद्धिं पवत्तितं पञ्हसाकच्छं पुच्छिस्सामीति गन्धमालचुण्णादीनि आदाय उपसङ्कमि. यदेव सो होतीति यदा एव सो होति. अथ वा यो एव सो होति. अरियकन्तानि सीलानीति मग्गफलसम्पयुत्तानि सीलानि. तानि हि अरियानं कन्तानि होन्ति, भवन्तरेपि न परिच्चजन्ति. सेसं चतुक्कनिपाते अग्गप्पसादसुत्ते वुत्तनयेनेव वेदितब्बं.