३. उपक्किलेससुत्तवण्णना

२३. ततिये न च पभस्सरन्ति न च पभावन्तं. पभङ्गु चाति पभिज्जनसभावं. अयोति काळलोहं. लोहन्ति ठपेत्वा इध वुत्तानि चत्तारि अवसेसं लोहं. सज्झन्ति रजतं. चित्तस्साति चातुभूमककुसलचित्तस्स. तेभूमकस्स ताव उपक्किलेसा होन्तु, लोकुत्तरस्स कथं होन्तीति? उप्पज्जितुं अप्पदानेन. यदग्गेन हि उप्पज्जितुं न देन्ति, तदग्गेनेव ते लोकियस्सपि लोकुत्तरस्सपि उपक्किलेसा नाम होन्ति. पभङ्गु चाति आरम्मणे चुण्णविचुण्णभावूपगमनेन भिज्जनसभावं. सम्मा समाधियति आसवानं खयायाति आसवानं खयसङ्खातस्स अरहत्तस्स अत्थाय हेतुना कारणेन समाधियति. एत्तावता चित्तं विसोधेत्वा अरहत्ते पतिट्ठितं खीणासवं दस्सेति. इदानिस्स अभिञ्ञापटिवेधं दस्सेन्तो यस्स यस्स चातिआदिमाह. तं उत्तानत्थमेवाति.