१. चरसुत्तवण्णना

११. दुतियस्स पठमे अधिवासेतीति चित्तं अधिरोपेत्वा वासेति. नप्पजहतीति न परिच्चजति. न विनोदेतीति न नीहरति. न ब्यन्तीकरोतीति न विगतन्तं परिच्छिन्नपरिवटुमं करोति. न अनभावं गमेतीति न अनुअभावं अवड्ढिं विनासं गमेति. चरम्पीति चरन्तोपि. अनातापीति निब्बीरियो. अनोत्तापीति उपवादभयरहितो. सततन्ति निच्चं. समितन्ति निरन्तरं. एवं सब्बत्थ अत्थं ञत्वा सुक्कपक्खे वुत्तविपरियायेन अत्थो वेदितब्बो.

गाथासु गेहनिस्सितन्ति किलेसनिस्सितं. मोहनेय्येसूति मोहजनकेसु आरम्मणेसु. अभब्बोति अभाजनभूतो. फुट्ठुं सम्बोधिमुत्तमन्ति अरहत्तमग्गसङ्खातं उत्तमञाणं फुसितुं.