६. कटुवियसुत्तवण्णना

१२९. छट्ठे गोयोगपिलक्खस्मिन्ति गावीनं विक्कयट्ठाने उट्ठितपिलक्खस्स सन्तिके. रित्तस्सादन्ति झानसुखाभावेन रित्तस्सादं. बाहिरस्सादन्ति कामगुणसुखवसेन बाहिरस्सादं. कटुवियन्ति उच्छिट्ठं. आमगन्धेनाति कोधसङ्खातेन विस्सगन्धेन. अवस्सुतन्ति तिन्तं. मक्खिकाति किलेसमक्खिका. नानुपतिस्सन्तीति उट्ठाय न अनुबन्धिस्सन्ति. नान्वास्सविस्सन्तीति अनुबन्धित्वा न खादिस्सन्ति. संवेगमापादीति सोतापन्नो जातो.

कटुवियकतोति उच्छिट्ठकतो. आरका होतीति दूरे होति. विघातस्सेव भागवाति दुक्खस्सेव भागी. चरेतीति चरति गच्छति. दुम्मेधोति दुप्पञ्ञो. इमस्मिं सुत्ते वट्टमेव कथितं, गाथासु वट्टविवट्टं कथितन्ति. सत्तमे वट्टमेव भासितं.