१. कुसिनारसुत्तवण्णना

१२४. ततियस्स पठमे कुसिनारायन्ति एवंनामके नगरे. बलिहरणे वनसण्डेति एवंनामके वनसण्डे. तत्थ किर भूतबलिकरणत्थं बलिं हरन्ति, तस्मा बलिहरणन्ति वुच्चति. आकङ्खमानोति इच्छमानो. सहत्थाति सहत्थेन. सम्पवारेतीति अलं अलन्ति वाचाय चेव हत्थविकारेन च पटिक्खिपापेति. साधु वत मायन्ति साधु वत मं अयं. गथितोति तण्हागेधेन गथितो. मुच्छितोति तण्हामुच्छनाययेव मुच्छितो. अज्झोपन्नोति तण्हाय गिलित्वा परिनिट्ठपेत्वा पवत्तो. अनिस्सरणपञ्ञोति छन्दरागं पहाय संकड्ढित्वा परिभुञ्जन्तो निस्सरणपञ्ञो नाम होति, अयं न तादिसो, सच्छन्दरागो परिभुञ्जतीति अनिस्सरणपञ्ञो. सुक्कपक्खो वुत्तविपरियायेन वेदितब्बो. नेक्खम्मवितक्कादयो पनेत्थ मिस्सका कथिताति वेदितब्बा.