४. परिसासुत्तवण्णना

९६. चतुत्थे न बाहुलिका होन्तीति पच्चयबाहुल्लिका न होन्ति. न साथलिकाति तिस्सो सिक्खा सिथिलं कत्वा न गण्हन्ति. ओक्कमने निक्खित्तधुराति ओक्कमनं वुच्चति अवगमनट्ठेन पञ्च नीवरणानि, तेसु निक्खित्तधुरा. पविवेके पुब्बङ्गमाति कायचित्तउपधिविवेकसङ्खाते तिविधेपि विवेके पुब्बङ्गमा. वीरियं आरभन्तीति दुविधम्पि वीरियं पग्गण्हन्ति. अप्पत्तस्साति झानविपस्सनामग्गफलसङ्खातस्स अप्पत्तविसेसस्स. सेसपदद्वयेपि एसेव नयो. पच्छिमा जनताति सद्धिविहारिकअन्तेवासिकादयो. दिट्ठानुगतिं आपज्जतीति आचरियुपज्झायेहि कतं अनुकरोति. यं ताय जनताय आचरियुपज्झायेसु दिट्ठं, तस्स अनुगतिं आपज्जति नाम. अयं वुच्चति, भिक्खवे, अग्गवती परिसाति, भिक्खवे, अयं परिसा अग्गपुग्गलवती नाम वुच्चति.

भण्डनजाताति जातभण्डना. कलहजाताति जातकलहा. भण्डनन्ति चेत्थ कलहस्स पुब्बभागो, हत्थपरामासादिवसेन वीतिक्कमो कलहो नाम. विवादापन्नाति विरुद्धवादं आपन्ना. मुखसत्तीहीति गुणविज्झनट्ठेन फरुसा वाचा ‘‘मुखसत्तियो’’ति वुच्चन्ति, ताहि मुखसत्तीहि. वितुदन्ता विहरन्तीति विज्झन्ता विचरन्ति.

समग्गाति सहिता. सम्मोदमानाति समप्पवत्तमोदा. खीरोदकीभूताति खीरोदकं विय भूता. पियचक्खूहीति उपसन्तेहि मेत्तचक्खूहि. पीति जायतीति पञ्चवण्णा पीति उप्पज्जति. कायो पस्सम्भतीति नामकायोपि रूपकायोपि विगतदरथो होति. पस्सद्धकायोति असारद्धकायो. सुखं वेदियतीति कायिकचेतसिकसुखं वेदियति. समाधियतीति आरम्मणे सम्मा ठपीयति.

थुल्लफुसितकेति महाफुसितके. पब्बतकन्दरपदरसाखाति एत्थ कन्दरो नाम ‘‘क’’न्ति लद्धनामेन उदकेन दारितो उदकभिन्नो पब्बतप्पदेसो, यो ‘‘नितम्भो’’तिपि ‘‘नदिकुञ्जो’’तिपि वुच्चति. पदरं नाम अट्ठ मासे देवे अवस्सन्ते फलितो भूमिप्पदेसो. साखाति कुसोब्भगामिनियो खुद्दकमातिकायो. कुसोब्भाति खुद्दकआवाटा. महासोब्भाति महाआवाटा. कुन्नदियोति खुद्दकनदियो. महानदियोति गङ्गायमुनादिका महासरिता.