५. सेक्खसुत्तवण्णना

८६. पञ्चमे उजुमग्गानुसारिनोति उजुमग्गो वुच्चति अरियमग्गो, तं अनुस्सरन्तस्स पटिपन्नकस्साति अत्थो. खयस्मिं पठमं ञाणन्ति पठममेव मग्गञाणं उप्पज्जति. मग्गो हि किलेसानं खेपनतो खयो नाम, तंसम्पयुत्तं ञाणं खयस्मिं ञाणं नाम. ततो अञ्ञा अनन्तराति ततो चतुत्थमग्गञाणतो अनन्तरा अञ्ञा उप्पज्जति, अरहत्तफलं उप्पज्जतीति अत्थो. अञ्ञाविमुत्तस्साति अरहत्तफलविमुत्तिया विमुत्तस्स. ञाणं वे होतीति पच्चवेक्खणञाणं होति. इति सुत्तेपि गाथासुपि सत्त सेखा कथिता. अवसाने पन खीणासवो दस्सितोति.