११. सङ्कवासुत्तवण्णना

९२. एकादसमे सङ्कवा नाम कोसलानं निगमोति सङ्कवाति एवंनामको कोसलरट्ठे निगमो. आवासिकोति भारहारो नवे आवासे समुट्ठापेति, पुराणे पटिजग्गति. सिक्खापदपटिसंयुत्तायाति सिक्खासङ्खातेहि पदेहि पटिसंयुत्ताय, तीहि सिक्खाहि समन्नागतायाति अत्थो. सन्दस्सेतीति सम्मुखे विय कत्वा दस्सेति. समादपेतीति गण्हापेति. समुत्तेजेतीति समुस्साहेति. सम्पहंसेतीति पटिलद्धगुणेहि वण्णं कथेन्तो वोदापेति. अधिसल्लिखतेति अतिविय सल्लिखति, अतिविय सल्लिखितं कत्वा सण्हं सण्हं कथेतीति अत्थो.

अच्चयोति अपराधो. मं अच्चगमाति मं अतिक्कम्म अधिभवित्वा पवत्तो. अहुदेव अक्खन्तीति अहोसियेव अनधिवासना. अहु अप्पच्चयोति अहोसि अतुट्ठाकारो. पटिग्गण्हातूति खमतु. आयतिं संवरायाति अनागते संवरत्थाय, पुन एवरूपस्स अपराधस्स दोसस्स खलितस्स वा अकरणत्थायाति अत्थो. तग्घाति एकंसेन. यथाधम्मं पटिकरोसीति यथा धम्मो ठितो, तथा करोसि, खमापेसीति वुत्तं होति. तं ते मयं पटिग्गण्हामाति तं तव अपराधं मयं खमाम. वुद्धिहेसा, कस्सप, अरियस्स विनयेति एसा कस्सप बुद्धस्स भगवतो सासने वुद्धि नाम. कतमा? यायं अच्चयं अच्चयतो दिस्वा यथाधम्मं पटिकरित्वा आयतिं संवरापज्जना. देसनं पन पुग्गलाधिट्ठानं करोन्तो ‘‘यो अच्चयं अच्चयतो दिस्वा यथाधम्मं पटिकरोति, आयतिं संवरं आपज्जती’’ति आह. न सिक्खाकामोति तिस्सो सिक्खा न कामेति न पत्थेति न पिहेति. सिक्खासमादानस्साति सिक्खापरिपूरणस्स. न वण्णवादीति गुणं न कथेति. कालेनाति युत्तप्पयुत्तकालेन. सेसमेत्थ उत्तानत्थमेवाति.

समणवग्गो चतुत्थो.