६. पठमभवसुत्तवण्णना

७७. छट्ठे कामधातुवेपक्कन्ति कामधातुया विपच्चनकं. कामभवोति कामधातुयं उपपत्तिभवो. कम्मं खेत्तन्ति कुसलाकुसलकम्मं विरुहनट्ठानट्ठेन खेत्तं. विञ्ञाणं बीजन्ति सहजातं अभिसङ्खारविञ्ञाणं विरुहनट्ठेन बीजं. तण्हा स्नेहोति पग्गण्हनानुब्रूहनवसेन तण्हा उदकं नाम. अविज्जानीवरणानन्ति अविज्जाय आवरितानं. तण्हासंयोजनानन्ति तण्हाबन्धनेन बद्धानं. हीनाय धातुयाति कामधातुया. विञ्ञाणं पतिट्ठितन्ति अभिसङ्खारविञ्ञाणं पतिट्ठितं. मज्झिमाय धातुयाति रूपधातुया. पणीताय धातुयाति अरूपधातुया. सेसमेत्थ उत्तानत्थमेवाति.