७. सङ्खतलक्खणसुत्तवण्णना

४७. सत्तमे सङ्खतस्साति पच्चयेहि समागन्त्वा कतस्स. सङ्खतलक्खणानीति सङ्खतं एतन्ति सञ्जाननकारणानि निमित्तानि. उप्पादोति जाति. वयोति भेदो. ठितस्स अञ्ञथत्तं नाम जरा. तत्थ सङ्खतन्ति तेभूमका धम्मा. मग्गफलानि पन असम्मसनूपगत्ता इध न कथीयन्ति. उप्पादादयो सङ्खतलक्खणा नाम. तेसु उप्पादक्खणे उप्पादो, ठानक्खणे जरा, भेदक्खणे वयो. लक्खणं न सङ्खतं, सङ्खतं न लक्खणं, लक्खणेन पन सङ्खतं परिच्छिन्नं. यथा हत्थिअस्सगोमहिंसादीनं सत्तिसूलादीनि सञ्जाननलक्खणानि न हत्थिआदयो, नपि हत्थिआदयो लक्खणानेव, लक्खणेहि पन ते ‘‘असुकस्स हत्थी, असुकस्स अस्सो, असुकहत्थी, असुकअस्सो’’ति वा पञ्ञायन्ति, एवंसम्पदमिदं वेदितब्बं.