९. चरियसुत्तवण्णना

९. नवमे लोकं पालेन्तीति लोकं सन्धारेन्ति ठपेन्ति रक्खन्ति. नयिध पञ्ञायेथ माताति इमस्मिं लोके जनिका माता ‘‘अयं मे माता’’ति गरुचित्तीकारवसेन न पञ्ञायेथ. सेसपदेसुपि एसेव नयो. सम्भेदन्ति सङ्करं मरियादभेदं वा. यथा अजेळकातिआदीसु एते हि सत्ता ‘‘अयं मे माता’’ति वा ‘‘मातुच्छा’’ति वा गरुचित्तीकारवसेन न जानन्ति. यं वत्थुं निस्साय उप्पन्ना, तत्थेव विप्पटिपज्जन्ति. तस्मा उपमं आहरन्तो ‘‘यथा अजेळका’’तिआदिमाह. नवमं.