१. सेनासनसुत्तवण्णना

११. दुतियस्स पठमे पञ्चङ्गसमन्नागतोति पञ्चहि गुणङ्गेहि समन्नागतो. नातिदूरं होति नाच्चासन्नन्ति यञ्हि अतिदूरे होति, पिण्डाय चरित्वा तत्थ गच्छन्तस्स कायचित्तदरथा होति, ततो अनुप्पन्नं वा समाधिं उप्पादेतुं उप्पन्नं वा थिरं कातुं न सक्कोति. अच्चासन्नं बहुजनाकिण्णं होति. चत्तालीसउसभमत्ते पन पदेसे वसतं दूरासन्नदोसविमुत्तञ्च गमनागमनसम्पन्नं नाम होति. दिवाअप्पाकिण्णन्ति दिवसभागे महाजनेन अनाकिण्णं.