६. निज्जरसुत्तवण्णना

१०६. छट्ठे निज्जरवत्थूनीति निज्जरकारणानि. मिच्छादिट्ठि निज्जिण्णा होतीति अयं हेट्ठा विपस्सनायपि निज्जिण्णा एव पहीना. कस्मा पुन गहिताति? असमुच्छिन्नत्ता. विपस्सनाय हि किञ्चापि निज्जिण्णा, न पन समुच्छिन्ना. मग्गो पन उप्पज्जित्वा तं समुच्छिन्दति, न पुन वुट्ठातुं देति. तस्मा पुन गहिता. एवं सब्बपदेसु योजेतब्बो. एत्थ च सम्माविमुत्तिपच्चया चतुसट्ठि धम्मा भावनापारिपूरिं गच्छन्ति. कतमे चतुसट्ठि? सोतापत्तिमग्गक्खणे अधिमोक्खट्ठेन सद्धिन्द्रियं परिपूरति, पग्गहट्ठेन वीरियिन्द्रियं, उपट्ठानट्ठेन सतिन्द्रियं, अविक्खेपट्ठेन समाधिन्द्रियं, दस्सनट्ठेन पञ्ञिन्द्रियं परिपूरेति, विजाननट्ठेन मनिन्द्रियं, अभिनन्दनट्ठेन सोमनस्सिन्द्रियं, पवत्तसन्ततिआधिपतेय्यट्ठेन जीवितिन्द्रियं परिपूरति…पे… अरहत्तफलक्खणे अधिमोक्खट्ठेन सद्धिन्द्रियं…पे… पवत्तसन्ततिआधिपतेय्यट्ठेन जीवितिन्द्रियं परिपूरतीति एवं चतूसु च मग्गेसु चतूसु च फलेसु अट्ठट्ठ हुत्वा चतुसट्ठि धम्मा पारिपूरिं गच्छन्ति.